كليبات ولا اروع - مدونة ميراف رؤية قريبة لمدى بعيد

اترككم مع كليبات من اختياري اتمنى ان تعجبكم

خطار عدنه الفرح أعلكـ صواني شموع

خافن يمر بالعجد رش العجد بدموع

ياقلبي وين الحزن.. حدر الحدر مدفوع

دومك تون ونتك تبجي بدمع مفجوع

طيفك أمل جذاب فوكـ السمه مرفوع

بالك تصيح بحزن صوت الحزن مسموع

خطار عدنه الفرح أعلكـ صواني إشموع

* *

شكبان

ليلك غضب

بالك تفر بالليل

دافن بصيص الأمل سهر نجوم إسهيل

والريل فات إوجزه.. مالك شغل بالريل

حط إلنه

موكد غضب

زوّد سعير الليل

ذوب شموع الوصل فرهد حبابي الهيل

بس لا يبوكـ العمر.. طيف العمر ملسوع

خطار عدنه الفرح أعلكـ صواني إشموع

* *

لملِم..

سنين العمر

نعثرها ليل الضيم

فارشها فوكـ الهضم طرزها لون الغيم

مشتال عمرك ذبل.. ما حن نثيث الديم

والكيظ

إجاك إبثكل

بصرك تظل إمجيم

خيال حلمك مركـ شتكله.. عيب إنهيم

يبست أنهار الأمل.. أنتظر روحي أتموع

خطار عدنه الفرح أعلكـ. صواني إشموع..!

* *

بدموعي

طيفك غركـ

إمسح دموع الطيف

شمسح جزاني الوكت.. راح الحلم ياحيف

كمريه ما مش بعد.. ليش إحنه موش بصيف؟

ظلمه..

إو دواشكـ حزن

لا تظن روحي إبكيف

غرّبْ شراع الفرح.. أهلاً إجانه الضيف

حسبالي يسوه العتب ثاري العتب مرفوع

خطار عدنه الفرح أعلكـ صواني إشموع..!.